Një vatër e fuqishme zjarri shkaktoi shqetësim të madh në jug të vendit, ku prej më shumë se 48 orësh mali i Borshit, pranë fshatit Borsh, vijon të digjet. Flakët kanë krijuar një situatë të rrezikshme për banesat në zonë dhe për turistët që qëndrojnë në hotele. Për shkak të terrenit të vështirë dhe përmasave të zjarrit, operacioni i shuarjes është kryer si nga toka, ashtu edhe nga ajri. Që prej orëve të para të mëngjesit, në ndihmë kanë ardhur helikopterë të cilët kanë ndërhyrë për të shuar vatrat më aktive, ndërsa zjarrfikësit dhe forcat e emergjencës kanë qenë në terren, duke luftuar me flakët në kushte shumë të vështira. Zjarri u vu përkohësisht nën kontroll rreth orës tre të mëngjesit, por erërat e forta që u shfaqën në mëngjes shkaktuan riaktivizimin e disa vatrave, duke rrezikuar sërish zonën e banuar.