4 të arrestuarit për vrasjen me lëndë plasëse të Hysni Ymerit janë lënë në burg nga Gjykata e Shkallës së Parë në Shkodër. Këtë të hënë, Edison Hasaj, Gjergj Zefi dhe Ergys Ibrahimi dolën para trupës gjykuese, ndërsa në një seancë tjetër veç u gjykua shtetasi Gert Bushati. Ky i fundit ka pranuar vendosjen e lëndës plasëse, ndërsa 3 të arrestuarit e tjerë kanë mohuar pjesëmarrjen në këtë ngjarje. Bushati edhe përpara trupës gjykuese ka pranuar instalimin e eksplozivit, por sipas tij nuk ka pasur dijeni për sasinë apo nëse do të përdorej për të vrarë njeri. Sipas tij, atij i është thënë nga 3 porositësit se do të jetë vetëm për të trembur dikë dhe jo për të vrarë. “Shtetasit Gjergj Zefi, Edison Hasaj dhe Ergys Ibrahimi më kanë kontaktuar për këtë punë dhe e kam pranuar. Lëndën plasëse e kam vënë me datë 27 dhjetor, por pa e ditur se bëhej fjalë për vrasje,” është shprehur Bushati, i cili ka deklaruar gjithashtu se nuk e ka idenë cila është arsyeja dhe se roli i tij ka qenë vetëm për ta vendosur, duke mos pasur më shumë informacion rreth kësaj çështjeje. Sipas burimeve hetimore dhe nga kamerat e sigurisë, është dokumentuar fakti se disa ditë më përpara sasia e eksplozivit është vënë edhe një herë tjetër, por ka pasur një defekt dhe, në këto kushte, Gert Bushati ka shkuar e ka marrë dhe e ka rivendosur sërish herën e dytë më 27 dhjetor. Pas dy ditësh, eksplozivi shpërtheu duke vrarë shtetasin Hysni Ymeri. Ndërkohë, 3 të arrestuarit e tjerë kanë mohuar çdo lloj akuze dhe nuk kanë folur në sallën e gjyqit. Viktima, Hysni Ymeri, nuk kishte probleme me ligjin, por vëllai i tij, vite më parë, në vitin 1995, është akuzuar për një vrasje të shtetasit Shefqet Çekorja. Ndërkohë, në vitin 2017, një kushëri i tij, shtetasi Dritan Ymeri, është i dyshuar si autor i vrasjes së mjekut Ilir Aliaj, por u arratis jashtë Shqipërisë pas ngjarjes. Policia dhe Prokuroria janë duke hetuar këto dy pista, por edhe çdo pistë tjetër të mundshme, sepse është ende e paqartë nëse vrasja e Hysni Ymerit lidhet me dy ngjarjet e sipërpërmendura apo lidhet me ndonjë konflikt tjetër.