Një mjet lundrues u bllokua nga njësia e policisë detare në plazhin e Ksamilit pasi shkeli perimetrin e sigurisë duke rrezikuar jetën e plazhistëve. Ndërkohë pronari u ndëshkua me masë administrative 200 mijë lekë të rinj. Varka e cila ishte ankoruar në afërsi të bregut, u konstatua nga shërbimet e policisë që patrullojnë plazhet me biçikleta. Aksioni u shtri dhe në Shëngjin, Spille dhe në Durrës, ku u bllokuan 11 Jet Ski, 1 gomone dhe 4 skafe, pasi kryen lundrime në zona të ndaluara. Por nga ana tjetër disa prej drejtuesve nuk kishin as dokumentacion të plotë për të lundruar në det. Të gjithë pronarët u gjobitën në varësi të shkeljeve. Policia Kufitare apelon të gjithë përdoruesit e mjeteve lundruese, që të zbatojnë rregullat me qëllim që ata dhe pushuesit e tjerë të jenë të sigurtë dhe të qetë. Kontrollet përgjatë vijës bregdetare, policia I ka shtuar akoma më shumë pas ngjarjes së një viti më parë ku në plazhin e Potamit humbi jetën 7-vjeçarja Jonada Avdia e cila u përplas nga një skaf që drejtohej nga ish efektivi I policisë Arjan Tase.