Ish-presidenti amerikan Bill Clinton u shtrua në Spitalin Universitar MedStar Xhorxhtaun në Uashington me temperaturë të lartë e mjekët po e mbajnë nën vëzhgim. 78-vjeçarit po i bëhen analiza, megjithatë sic tha Angel Urena, zëvendësshefi i stafit të demokratit, ai mbetet në gjendje të mirë shpirtërore dhe është shumë mirënjohës për kujdesin e shkëlqyer që po merr”. Që kur u largua nga Shtëpia e Bardhë gati një çerek shekulli më parë, presidenti i 42-të i SHBA-së ka përjetuar disa probleme shqetësuese shëndetësore. Në vitin 2004, ai iu nënshtrua një operacioni në zemër pas dhimbjesh të vazhdueshme në gjoks dhe vështirësisë në frymëmarrje. Një vit më vonë, u rikthye në spital për një operacion në mushkëri dhe në 2010-tën iu vendosën dy stenta në një arterie koronare. Në vitin 2021, ish-presidenti u shtrua në spital për gjashtë ditë në Kaliforni, ndërsa po trajtohej për një infeksion që nuk lidhej me COVID-19, në kohën kur pandemia ishte ende në kulmin e saj. Clinton, një demokrat që shërbeu dy mandate si president nga janari 1993 deri në janar 2001, foli në Konventën Kombëtare Demokratike në Çikago këtë verë dhe bëri fushatë përpara zgjedhjeve të nëntorit për përpjekjen e pasuksesshme të zëvendëspresidentes demokrate Kamala Harris në garën për Shtëpinë e Bardhë. Ai ka qenë mjaft i angazhuar e ka pasur dhe një axhendë të ngjeshur udhëtimesh që prej publikimit të librit të tij të ri, "Qytetari: Jeta ime pas Shtëpisë së Bardhë".