Një anketë e re e agjencisë e lajmeve Associated Press me Qendrën për Hulumtim të Çështjeve Publike NORC thotë se gati dy të tretat e demokratëve duan që ai të tërhiqet nga gara presidenciale. Anketa e publikuar pas paraqitjes së dobët të Biden në debat vlerëson se vetëm 3 në 10 demokratë janë shumë të bindur se zoti Biden ka aftësinë e duhur mendore të shërbejë me efikasitet si president, një rënie prej 40 për qind në krahasim me anketën e zhvilluar nga këto organizata në muajin shkurt. Anketa megjithatë nuk tregon se si ka ndikuar atentati I dështuar ndaj Donald Trump në rezultatet për zotin Biden, megjithatë një numër i vogël i pyetjeve të sondazhit, që u bënë pas kësaj ngjarjeje nuk përcjellin ndonjë sinjal paraprak se pozitat e Biden janë përmirësuar. Në përgjithësi, shtatë në 10 amerikanë mendojnë se zoti Biden duhet të tërhiqet nga gara dhe kryesisht kundër tij janë më të rinjtë në moshë. Nga ana tjetër anketa nxjerr se rreth 6 në 10 amerikanë duan po ashtu që zoti Trump të tërhiqet nga gara. Zhvillimet e fundit kanë bërë që amerikanët të mendojnë se zoti Trump ka më shumë gjasa të fitojë zgjedhjet e vitit 2024 me një diferencë 42 me 18 për qind. Këto përfundimi nxjerrin në pah sfidat me të cilat përballet presidenti 81 vjeçar ndërkohë që përpiqet t’u japë fundi zërave brenda partisë së tij për t’u larguar nga gara dhe mundohet të bindë demokratët se ai është kandidati më i mirë për të mundur ish-presidentin Donald Trump.