Ndërsa Rama kërkoi votën e “Kamzës blu”, Sali Berisha ia drejtoi këtë kërkesë Vlorës socialiste. Kreu i opozitës premtoi se do e rendisë Shqipërinë të parën në rajon për rrogat e pensionet. “Këtë regjim, këtë të keqe, do e shkulim nga rrënjët. Do e përcjellim në arkivat e historisë. U jap ju fjalën se 3 muajt e parë, kjo situatë përmbyset. Shqiptarët në mjerim nuk do ketë më. Nuk do ketë rrogë minimale nën 500 euro. Mësuesit e fëmijëve tanë do marrin 1500 euro. Shqipëria, shqiptarët nisin udhën për të dalë në krye të vendeve të rajonit për rrogat, pensionet dhe mbështetjen e tyre”. Gjatë prezantimit të kandidatëve të Qarkut të Vlorës, Berisha bëri një paralajmërim për të gjithë ata që tentojnë të vjedhin votat. “Nga Vlora paralajmëroj çdo bandit kudo që ndodhet, se po u implikuat me votat, do të cilësoheni grupe terroriste, shqiptare dhe ndërkombëtare. U them bandave nga Shkodra deri në Gjirokastër e kudo që janë, mos guxoni të frikësoni qytetarët se ju jap fjalën e nderit, do shpalleni terroristë ndërkombëtarë, çka do të thotë se do keni ndëshkime që nuk i imagjinoni ju”. Sali Berisha iu premtoi vlonjatëve zonë të lirë industriale dhe se do t’i japë fund ndtjes së qytetit bregdetar.