Betejën për të shpallur të pavlefshme zgjedhjet parlamentare të 11 Majit, Sali Berisha e zhvendosi në Asamblenë e Politike të Partisë Popullore Europiane, në Bruksel. Kreu i Partisë Demokratike i kërkoi PPE-së të sjellë një mision në Shqipëri për të verifikuar zgjedhjet. “Ndihma që kërkoj ende nga PPE-ja dhe partitë motra është dërgimi i një misioni verifikues në vendin tim, një mision fakt-mbledhës, që do të kishte rëndësi të jashtëzakonshme, jo vetëm për Shqipërinë, por edhe për vendet tuaja. Një mision fakt-mbledhës nga Partia Popullore Europiane është më se i domosdoshëm”. Kjo kërkesë e Berishës mori përgjigje nga Sekretarja e Përgjithshme e PPE-së, Dolors Montserrat, e cila tha se dërgimi i një misioni në Shqipëri do të jetë prioritet dhe objektiv i Partisë Popullore Europiane.