Kandidati i Partisë Socialiste, Vangjel Tavo, është tashmë kryetari i ri i zgjedhur për të drejtuar bashkinë e Himarës. E ndërsa opozita, me në krye Sali Berishën, por dhe vetë kandidatin që ishte përballë Tavos, Petro Gjikuria, deklarojnë se “zgjedhjet u vodhën”, nga ana tjetër Fredi Beleri e njeh rezultatin. Nga burgu, ai i ka dërguar një letër kryetarit të ri të bashkisë, duke i kërkuar që në Himarë të ndërtojë edhe një gjimnaz në gjuhën greke. “Kemi nevojë për ngritjen e një shkolle të mesme minoritare, diçka që e kërkojmë prej tre dekadash, që fëmijët tanë të mos shkulen nga rrënjët e tyre. Dhe, gati tridhjetë e pesë vjet pas rënies së komunizmit në Shqipëri, përfundimisht, ne kërkojmë kthimin e titujve të pronësisë pronarëve të ligjshëm. Sot ka lindur një realitet i ri, por ne jemi mësuar të ecim në monopate të vështira”, shkruan ai mes të tjerash. Fredi Beleri u arrestua në 12 maj të 2023, dy ditë para zgjedhjeve vendore me akuzën e blerjes së votave dhe u dënua për korrupsion me dy vite burg. Prangosja e tij u bërtit fort nga opozita e më pas nga Athina zyrtare, të cilët e quajtën si sulm politik. Pas kësaj kryetari në detyrë Jorgo Goro, përfundoi gjithashtu në pranga nën akuzën e shpërdorimit të detyrës pas tjetërsoi pronat në mënyrë të paligjshme. E gjithë kjo histori solli zgjedhje të reja në bashkinë e Himarës dhe më 4 gusht u votua Vangjel Tavo në krye të saj.