Ndonëse avokati e braktisi për shkak të bojkotit kombëtar, tanimë që i mbylli dy vitet e burgut, ish-gjyqtares Enkeleida Hoxha i intereson vetëm gjetje e drejtësisë personale në Apelin e Posaçëm. Ish-gjyqtarja u paraqit me shpresën se seanca nuk do të dështonte, por procesi nuk u zhvillua ashtu si edhe qindra të tjerë në të gjithë vendin. Bojkoti i seancave gjyqësore nga avokatët që kundërshtojnë shkrirjen e 18 gjykatave, nuk ka sjellë asnjë reagim nga Këshilli i Lartë Gjyqësor. Pavarësisht se i përket ekzekutivit dhe jo gjyqësorit, ministri i Drejtësisë ishte i qartë se s’do ketë hap pas. Por Dhoma Kombëtare e avokatisë ka lënë dhe dy ditë kohë për të reflektuar, mbasi nga greva të enjten në orën 11:00, avokatët nisin protestën para KLGJ-së. Ndërkohë, në gjykatë përpos avokatëve grevëthyes që paraqiten në masat e sigurimit personal, të tjerët vijnë vetëm për informacion. Të mërkurën, avokatët përfaqësuesit e pro dhe kundër grevës do të jenë të pranishëm në komisionin e ligjeve. Në të gjithë Shqipërinë, numërohen dy mijë avokatë me licensa aktive, dhe ky është bojkotimi i tretë brenda pak javësh që ka shkaktuar paralizim të gjyqësorit.