Lituania ka marrë masa një ditë pasi dy avionë rusë shkelën hapësirën e saj ajrore, duke thirrur në një takim sqarues të ngarkuarin me punë të Ambasadës e Rusisë në Vilnius. Vilniusi i kërkoi Rusisë të shpjegojë menjëherë arsyet e shkeljes së hapësirës ajrore të Lituanisë. “Rusia duhet ta ndalë sjelljen e saj agresive, ta respektojë të drejtën ndërkombëtare dhe kufijtë e shteteve fqinje”, thuhet në një njoftim të ministrisë së mbrojtjes, por ndërkohë Ministria e Mbrojtjes e Rusisë e mohoi të ketë pasur shkelje. “Fluturimet u kryen në përputhje të rreptë me rregullat për përdorimin e hapësirës ajrore mbi territorin rus. Aeroplanët nuk devijuan nga rruga e tyre dhe nuk shkelën kufijtë e shteteve të tjera”, tha Ministria ruse në Telegram. Gjatë së enjtes ushtria lituaneze tha se një avion luftarak, Sukhoi SU-30, dhe një avion cisternë, IL-78, nga enklava ruse e Kaliningradit kaluan në hapësirën ajrore të Lituanisë për 18 sekonda. Kjo nuk është hera e parë që Rusia provokon duke shkelur hapësirat ajrore të vendeve të NATO-s. Tri vendet baltike, Estonia, Lituania dhe Letonia, anëtare të NATO-s dhe mbështetëse të forta të Ukrainës, kanë përjetuar shkelje të territorit të tyre nga avionë ose dronë rusë në muajt e fundit.