Policia e Shkodrës dyshon se vrasja e të riut Kristian Kola mund të jetë kryer nga vrasës profesionistë, të cilët e kanë miremenduar atentatin. I riu është survejuar nga atentatorët, dhe në ngjarje dyshohet për përfshirjen edhe të bashkëpunëtorëve të tjerë, të cilët mund të kenë njoftuar për lëvizjet e tij. Kola kishte parkuar automjetin e tij përpara hotelit në qendër të qytetit të Shkodrës, ishte futur brenda, kishte takuar disa miq dhe kishte qëndruar aty për disa minuta. Ai ka dalë nga hoteli me një shok, dhe sapo janë përshëndetur me njëri-tjetrin, një motor me dy persona, të veshur me skafanderë, është afruar duke qëlluar disa herë në drejtim të 34-vjeçarit. Dyshohet se autorët kanë përdorur një armë me silenciator, pasi në zonë nuk janë dëgjuar krisma. Më pas, motori është larguar me shpejtësi nga vendi i ngjarjes, pa lënë gjurmë. Policia dhe prokuroria dyshojnë se autorët janë profesionistë për shkak të mënyrës se si e kanë kryer krimin në një zonë me shumë lëvizje, kalimtarë dhe klientë, dhe po hetohet për bashkëpunëtorët që mund të kenë njoftuar për lëvizjet e të riut. Ende nuk ka një motiv të qartë për vrasjen, teksa Kristian Kola nuk rezulton të ketë një të kaluar kriminale. Ai, së bashku me babain, kishte një firmë të vogël ku bashkë kryenin punime në ndërtim.