Një avion ushtarak transporti i Rusisë është rrëzuar mbrëmë me raketë dhe ka shpërthyer më pas në një zjarr gjigant, sikurse njofton Sudani, vend i përfshirë në një konflikt të rëndë mes dy fraksioneve ushtarake. Avioni i transportit ushtarak ishte i tipit Ilyushin Il-76T dhe u rrëzua me shpërthim në perëndim të vendit. Raportimet nga vendi janë kontradiktore. Mediat vendase thanë se raketa që e goditi u lëshua nga forcat rebele RSF, ndërsa burime të tjera se goditja kishte ardhur “gabimisht” nga pala mike, pa lejuar të bëhet e qartë se cilën palë ‘po ndihmonte’ avioni me furnizime. Të tjera burime pretendojnw se avioni prodhimit rus operohej nga Emiratet e Bashkuara Arabe. Pas shpërthimit, mbetjet avionit u përhapën në një zonë të gjerë, ndërsa në pamje të postuara duken ushtarët që celebronin rrëzimin e avionit. Emiratet e Bashkuara Arabe janë raportuar më herët se mbështesin me armatime e pajisje forcat rebele të konfliktit, ku deri tani janë vrarë dhjetra mijëra njerëz. Ambasada ruse në Sudan tha se po kontaktonte me autoritetet lokale për të hetuar mbi rrethanat. Konflikti në vend i financuar dhe furnizuar nga palë të ndryshme, vijon prej vitit të shkuar.