Zjarret në Dropull po shkaktojnë një situatë kritike pasi flakët po përparojnë drejt zonave të banuara. Një banor Frashtanit, Kristaq Ziso, është gjendur i asfiksuar në hyrje të fshatit, pasi flakët përparuan nga maja e malit drejt zonave të banuara. Ai është dërguar në gjendje të rënduar shëndetësore në spitalin e Gjirokastrës dhe pritet të transportohet për trajtim më të specializuar drejt spitalit të Janinës. Burime nga vendngjarja konfirmojnë se era e fortë ka avancuar flakët që po depërtojnë në afërsi të oborreve të banesave në tre fshatra të Dropullit. Disa kasolle në periferi të fshatit Lugar janë djegur. Zjarri është gati 100 metra larg zonës se banuar në fshatrat Lugar dhe Goricë. Forcat zjarrfikëse dhe banorët e këtyre fshatrave si dhe vullnetarë të zonës po punojnë për shuarjen e flakëve. Ndërkohë pas mungesës së helikopterit nga Tirana, është kërkuar ndihmë nga Greqia ku pritet të mbërrije një helikopter për të shuar zjarret.