Drejtori i Përgjithshëm i Policisë së Shtetit, Muhamet Rrumbullaku ka zbardhur detaje nga rezultatet e megaoperacionit policor të koduar “Flakë në det”, i zhvilluar në bashkëpunim me partnerët ndërkmbëtar më 15 gusht. Në një konferencë për shtyp, Rrumbullaku zbuloi se një mjet lundrues nga Laguna e Patokut drejt jug-perëndim ka kontaktuar me një velierë për të shpërndarë lëndë narkotike. “Në megaoperacion u përfshinë avionët e FRONTEX-it, ndërsa nga deti u përfshinë mjetet e Policisë Kufitare dhe mjete të GDF-së, të cilat kanë bërë rrethimin e velierës. Shtetasit sapo kanë vënë re që ishin në ndjekje nga Policia i kanë vënë flakën mjetit lundrues dhe kanë tentuar të arratisen, por janë arrestuar nga policia”– tha Rrumbullaku. Në cilësinë e provës materiale janë sekuestuar dy armë zjarri pistoletë, municione luftarake, një sasi e madhe parash të valutave të ndryshme, 25 celular, si dhe 25 kg kanabis të gjetura në det në afërsi të vendit ku u fundos veliera dhe një gomone.