Një arratisje spektakolare nga burgu konsiderohet ajo e trafikantit shqiotar Roland Dedja, që pushtoi titujt e shtypit në vendin fqinj për nga mënyra e organizimit. 39 vjecari i dënuar i dënuar për trafik lëndësh narkotike, ishte ndihmuar me dron nga jashtë. Ai ka arritur të presë hekurat e dritares së qelisë së tij në burgun e Teramos, e të zbriste prej andej me litar. Dhe kjo nuk ishte arratisja e tij e parë. Dedja kishte arritur të largohej në 2010-tën nga burgu i Pisas ku qe mbyllur nën akuzën e vrasjes së një bashkëkombasi në Brescia, akuzë kjo për të cilën dy vjet më vonë do të shpallej i pafajshëm. Sipas raporteve në shtypin Italian, për të mashtruar oficerët e burgut, Deja, që nuk e ndante qelinë me dikë tjetër, kishte simuluar praninë e tij në shtrat sikur ishte i mbuluar kokë e këmbë. Mendohet se falë ndihmës së një droni, ai ka siguruar nga jashtë pajisjet e nevojshme për arratisjen. Policia është vënë në kërkim të 39 vjecarit, duke i fokusuar kontrollet e saj në zonat bregdetare. Hipotezat e hetuesve janë se Roland mund të tentojë të marrë një mjet transporti për të kaluar Adriatikun. Për lëvizjet e mundshme të tij janë njoftuar dhe autoritetet portuale, ndërsa shtrirja e kërkimeve shkon nga Ankona në jug të Abruzzo-s.