Blinken nuk trembet nga Putin Armët bërthamore në Bjellorusi? Blinken: S’ka indikacione për përdorim Sekretari amerikan i Shtetit Antony Blinken thotë se ushtria amerikane nuk e ka ndryshuar qëndrimin e saj bërthamor në përgjigje të deklaratës së presidentit Vladimir Putin se Rusia kishte vendosur armë bërthamore në Bjellorusi. Deklaratat Blinken i bëri gjatë një deklarate të përbashkët me homologun e tij nga Singapori. “Nuk ka indikacione se Rusia po përgatitet të përdorë armë bërthamore dhe po ashtu nuk ka arsye pse Shtetet e Bashkuara të Amerikës duhet të rishohin politikat e tyre për armët bërthamore”, tha Blinken për gazetarët. Më herët Presidenti rus Vladimir Putin konfirmoi se Rusia ka dërguar armë bërthamore Bjellorusisë, vendi që kufizohet me Ukrainën dhe se mund t’i përdorë në rast kërcënimi. Armët bërthamore taktike janë armë në fushëbetejë që, megjithëse janë shkatërruese, kanë një rendiment më të vogël në krahasim me armët strategjike me rreze të gjatë. Njoftimi i Putinit kishte nxitur frikën e konfliktit bërthamor, por ekspertët dhe qeveritë raportuan se nuk kishte gjasa që ai të ndryshonte rrjedhën e konfliktit. Bjellorusia, e cila është një nga aleatët më të afërt të Moskës, ka ndihmuar Rusinë të niste agresionin e saj ndaj Ukrainës në shkurt të vitit 2022, duke i lejuar Kremlinit të hyjnë në vend nga veriu.