Autoritetet izraelite publikuan sot emrat e 95 të burgosurve palestinezë, shumica prej tyre gra dhe të mitur, të cilët mund të lirohen të dielën në shkëmbimin e parë të pengjeve izraelitë të mbajtur nga Hamasi. “Lirimi i të burgosurve nuk do të bëhet para orës 16:00 të së dielës”, tha Ministria e Drejtësisë. Kabineti i sigurisë i Izraelit i ka dhënë dritën jeshile një marrëveshjeje për armëpushim në Rripin e Gazës, e cila do të duhet të miratohet gjithashtu nga qeveria izraelite. Marrëveshja fillimisht parashikon lirimin e 33 pengjeve izraelitë dhe lirimin e disa qindra palestinezëve të mbajtur në burgjet izraelite. Lista përfshin 70 gra dhe 25 burra, 9 prej të cilëve janë nën moshën 18 vjeç. Sipas informacioneve nga ministria, më i riu është 16 vjeç. Vetëm shtatë prej tyre u arrestuan para 7 tetorit 2023, ditën kur Hamasi sulmoi Izraelin. Sipas zyrës së Benjamin Netanyahut, lirimi i pengjeve izraelitë do të fillojë të dielën.