Ish-presidenti i Finlandës, fituesi i Çmimit Nobel për Paqe dhe shpeshherë i përshkruar si arkitekti i pavarësisë së Kosovës, Martti Ahtisaari është shtruar në spital pasi është sëmurë me Covid për të dytën herë. Ish-ndërmjetësuesi ndërkombëtar i konflikteve, 84-vjeçari Ahtisaari u infektua , për herë të parë me koronavirus në mars të 2020-s. Fondacioni i tij njotoi hospitalizimin e tij, por thotë se gjendja për momentin duket e stabilizuar. Ahtisaari ishte i dërguari special i Organizatës së Kombeve të Bashkuara për Kosovën, i ngarkuar për organizimin e negociatave të procesit të statusit të Kosovës, mbi planin e të cilit Kosova më 17 shkurt 2008 shpalli pavarësinë.President i Finlandës nga viti 1994 deri më 2000, Ahtisaari u shpërblye edhe me Çmimin Nobel për Paqe pikërisht në vitin 2008 për kontributin e tij dhënë përfundimit të konflikteve edhe në Indonezi, Namibi apo Irlandën Veriore. Nga jeta publike dhe politike u tërhoq në shtator pasi u diagnostikua me sëmundjen e Alzajmerit. Dokumenti i hartuar prej tij, i njohur dhe si pakoja Ahtisari, ishte ai që hodhi në vija të përgjithshme konturet e shtetit të Kosovës. Ky plan ishte rezultati i përpjekjeve të gjata të Kosovës për të mbërritur deri në një zgjidhje të statusit të saj përfundimtar.