Një ditë pasi Altin Dumani u shpall nga DASH kampion kundër korrupsionit, Artur Zheji ka bërë një analizë të gjatë për kreun e SPAK, që e quan ndryshe “Prokurori me Kurorë”. Artur Zheji Ndodhi ajo që nuk pritej por që shumëkush e dëshironte! Altin Dumani, i ndrojturi që nuk kontrollon dot emocionet kur flet në publik, i mallkuari dhe kamzhiku i mëkatarëve, i bekuari i të pashpresëve të pafuqishmëve që s’kanë gojë e mikrofon, i hekurti me natyrë të brishtë, u kurorëzua si Kampion i Antikorrupsionit, nga amerikanët. Por kush është Prokurori që do të mbahet mend gjatë në Shqipëri? Sigurisht Dumani është mishërimi i burrit më atipik që ka prodhuar vendi ynë, apo vendi i shqiponjave të lodhura, këto 30 vitet e fundit. Altini, po shpalos ndër shumicën e përdhosur dhe të dorëzuar moralisht të shqiptarëve, një algoritëm të ri, një moral institucional trimëror, që deri dje, mbiquhej fantazi romantike, apo thjesht një absurd i pambrritshëm!