Edhe pse e ka dritën jeshile të administratës Biden, Turqia ishte e përgatitur se përpjekja e saj për të blerë nga SHBA-ja avionë luftarakë F16 do të haste në vështirësi të mëdha në kongresin amerikan, dhe ashtu ndodhi. Ligjvënës demokratë e republikanë i kërkuan qeverisë të mos ia shesë këto avionë Ankarasë.Në një letër drejtuar Presidentit Biden e sekretarit të Shtetit, Antony Blinken, njëmbëdhjetë anëtarë të Dhomës së Përfaqësuesve shfaqën shqetësim rreth mundësisë që Turqia të blejë 40 F16-ta të rinj nga “Lockheed Martin” dhe 80 sete modernizimi për avionët e këtij lloji. “Pas njoftimit të Presidentit Erdogan në shtator se Turqia do të blejë një pjesë të re të sistemeve ruse për mbrojtje raketore, S-400, ne nuk mund ta përballojmë kompromisin ndaj sigurisë sonë kombëtare duke i dërguar avionë të prodhuar në SHBA një aleati të traktatit që vazhdon të sillet si kundërshtar”, thuhet në letër. “Kemi besim se Kongresi do të qëndrojë i bashkuar për të bllokuar eksporte të tilla”, theksohet më tej. “Reuters” raportoi disa javë më parë se Turqia i ka bërë kërkesë ShBA-së për blerjen e 40 avionëvë luftarakë “F-16” . Ankaraja më parë kishte porositur më shumë se 100 avionë F35 nga “Lockheed Martin”, por Ëashingtoni e përjashtoi nga programi për prodhimin e tyre në vitin 2019, pas turqit blenë sistemin rus të mbrojtjes ajrore, S-400.