Policia i ka vijuar aksionet antikanabis edhe këtë të premte. Në qarkun e Kukësit si rezultat i kontrolleve të ushtruara me dron nga ajri por dhe toka, agjentët zbuluan 297 bimë kanabis në fshatin Gjonpepaj. Lënda narkotike u asgjësua me anë të djegies ndërsa u procedua penalisht kryetari I fshatit për moskallëzim krimi dhe shpërdorim detyre. Kjo pasi nga veprimet e para hetimore mendohet se ai kishte dijeni për mbjelljen e drogës por nuk e kishte denoncuar rastin. Ndërkohë hetuesit po vijojnë veprimet hetimore, me qëllim identifikimin dhe arrestimin e të gjithë personave të përfshirë në të këtë veprimtari kriminale. 654 bimë kanabisi u dogjën dhe në qarkun e Lezhës. Droga ishte kultivuar në një fshat malor të Mirditës dhe në një fshat të Lezhës. Ndërkohë materialet procedurale, për të dyja rastet i kaluan prokurorive përkatëse, për veprime të mëtejshme.