Dy aksidente me pasojë disa të plagosur kanë ndodhur mëngjesin e kësaj të marte në Mat e Korçë. Aksidenti i parë është regjistruar në Mat, në vendin e quajtur "Shkallë Xibër" ku një makinë ka dalë nga rruga dhe ka përfunduar në lumë, ku për pasojë janë plagosur dy persona. Kanë qenë drejtuesit e mjeteve të tjera ata që kanë pikasur aksidentin, duke njoftuar më pas policinë dhe ambulancën e cila ka bërë të mundur transportimin e dy të plagosurve në spital. Shkak për aksidentin dyshohet të jetë bërë lagështira në rrugë por nuk përjashtohet as shpejtësia. Ndërkohë që aksidenti i dytë ndodhi në afërsi të fshatit Dvoran ku dy automjete janë përplasur me njëra tjetrën, ndërsa njëra prej tyre është përmbys duke lënë të bllokuar drejtuesin brenda mjetit. Policia, ambulanca dhe zjarrfikësja kanë shkuar në vendngjarje për të nxjerrë nga mjeti personin e bllokuar.