Prokuroria Speciale e Kosovës dorëzoi të martën në Gjykatën Themelore një aktakuzë ndaj ministres në detyrë të Industrisë dhe Tregtisë, Rozeta Hajdari, si dhe ndaj tre të tjerëve, për keqpërdorimin e dyshuar të rezervave shtetërore. Prokuroria tha se ministrja Hajdari dhe dy zyrtarët Irfan Lipovica dhe Hafiz Gara dyshohen se në bashkëpunim kanë keqpërdorur detyrat zyrtare, me qëllim që të përfitonin pasuri për persona të tjerë, duke i shkaktuar dëm buxhetit të Kosovës gjatë muajve shkurt dhe mars 2022. Buxheti i shtetit ka pësuar një dëm prej rreth 3 milionë eurove si pasojë e veprimeve të tyre, tha Prokuroria në një njoftim. Ata dyshohet se asokohe kishin blerë një sasi vaji dhe një sasi gruri jashtë vendit, që nuk kishin arritur kurrë në Kosovë.