Kërcënimi i presidentit të Francës, Emmanuel Macron se çështja e liberalizimit të vizave për Kosovën mbetet e hapur nxiti reagim në Prishtinë. Kryediplomatja kosovare, Donika Gërvalla përmes rrjeteve sociale tha "Et Voila" ose "Ja pra" me flamurin francez. Nënkryetarja e partisë më të madhe opozitare në Kosovë, PDK-së, Vlora Çitaku e cilësoi si në rënie të lire dhe pa krye diplomacinë e Kosovës. "Më i dëmshëm është konstatimi i Presidentit Macron për lidershipin e Kosovës si njerëz të pabesë që nuk e mbajnë fjalën, sesa deklarata për viza. Ndërkohë reagimi i Ministres së Jashtme skandaloz. Diplomaci pa krye. Në rënie të lirë", tha Çitaku. Ndërkohë, njohësit e çështjeve ndërkombëtare thonë se mundësia që Franca të pezullojë liberalizimin e vizave për Kosovën në këtë kohë janë zero.