Gjykata e Prishtinës ka dënuar me 62 vite burg 6 të akuzuar për përdhunimin e një vajze të mitur në vitin 2022. Gjykata i ka shpallur ata fajtor për veprën penale të dhunimit dhe ka dënuar me 12 vite burg njërin prej të akuzuarve, ndërsa 5 të tjerë janë dënuar me nga 10 vite burg. Ngjarja e rëndë që tronditi mbarë opinionin publik në Kosovë, u denoncua nga nëna bashkë me vajzën dy vjet më parë. E mitura tregoi se ishte abuzuar në grup në një park, ndërsa hetimet treguan se me 11-vjeçaren, të rinjtë, disa edhe të mitur, kishin abuzuar më shumë se një herë për një periudhë mbi njëvjecare. Rasti i rëndë nxiti reagime të ashpra të institucioneve dhe organizatave për mbrojtjen e të drejtave të njeriut, ndërsa pati edhe protesta të njëpasnjëshme në Kosovë, mes shqetësimeve për shkallën e ulët të sigurisë së grave dhe vajzave atje si dhe trajtimin rasteve të dhunës ndaj tyre nga autoritetet e Kosovës. Kjo ngjarje detyroi drejtorin e atëhershëm të policisë së Kosovës, Samedin Mehmetin dhe shefin e drejtorisë për trajtimin e të burgosurve dhe të miturve, Ali Gashin, të japin dorëheqjen.