Ditën e sotme policia e Vlorës ka proceduar penalisht një vlonjat dhe një 23-vjeçar turk, i fundit ky që i kishte dhënë shqiptarit një shumë parash në mënyrë që ai të siguronte disa vota për zgjedhjet e 25 prillit, në favor të LSI-së. I proceduari turk është Abdul Gafur Balikci, i cili është përkrahur publikisht edhe nga kandidati për deputet i LSI-së, në Vlorë, i renditur i pari në listë, Luan Rama. Ndërsa vlonjati i proceduar është Juriseld Mucaj, 24 vjeç. “Top Channel” ka mësuar se shtetasi turk ka edhe një klinikë dentare në Vlorë. Mësohet se gjatë ndalimit të tyre, u është gjetur një bllok me emra, të personave që dyshohet se do u blinin votën si edhe u janë sekuestruar telefonat celularë për shkak se ka pasur biseda që konfirmonin këtë vepër penale. Dy personat po procedohen penalisht dhe çështja do të ndiqet nga SPAK, si kompetenti për hetimin e krimeve zgjedhore.