Një organizatë kriminale që merrej me trafikun e kokainës nga Kolumbia në Europë u çmontua nga autoritetet spanjolle dhe ato portugeze. Në pranga përfunduan nëntë anëtarët e "klanit Piturros", një grup kriminal ky i lidhur historikisht me trafikun e lëndëve narkotike që nga vitet ‘80. Aksioni u zhvillua në bashkëpunim me Europol dhe Eurojust, ndërsa u kryen kontrolle në 12 banesa. Ky klan ishte një nga më të rrezikshmit. Ai, sipas njoftimit të Gardës Civile, bashkëpunonte ngushtë me klanin shqiptar Farruku. Një nga organizatat kriminale kjo më aktive në trafikun e drogës nga vendet e Amerikës latine drejt vendeve të BE. Të gjitha ngarkesat e drogës nga vendet e Amerikës latine pothuajse bëheshin për interes të grupit shqiptar, I cili më pas e shpërndante për ta shitur në qytete të ndryshme të vendeve të Bashkimit Europian. Agjentët ranë në gjurmët e trafikantëve në muajin shkurt kur po verifikonin klanin Arousano, I cili mobilizoi të gjithë bashkëpunëtorët e tij për të mbledhur një ngarkesë kokaine në ujërat e Atlantikut. Por një operacion I dytë I zhvilluar në muajin prill ku u kapën 220 kilogramë kokainë ndihmoi hetuesit që të binin në gjurmët e të gjithë anëtarëve të klanit Piturros, I cili përmes brigjeve të Portugalisë mundi të fut në Spanjë afro 2 tonë kokainë. Të arrestuarit akuzohen për trafik droge, dhe pastrim parash.