Tiranë – Një person i shpallur në kërkim për vrasje të mbetur në tentativë është arrestuar nga policia e shtetit gjatë natës. Po ashtu mësohet se në pranga ka rënë edhe një oficer policie që u kap në banesë me personin që ishte shpallur në kërkim. Gjatë operacionit është vënë në pranga edhe një person i tretë. I arrestuari është A. B., 32 vjeç, banues në Tiranë, i shpallur në kërkim në vitin 2019, nga Drejtoria Vendore e Policisë Tirane, pasi Gjykata pranë Shkallës së Parë Tiranë i ka caktuar masën e sigurisë “Arrest në burg” për veprat penale “Vrasja me dashje” e mbetur në tentativë, kryer në bashkëpunim dhe “Armëmbajtja pa leje”. Ky person, në vitin 2019, dyshohet se ka tentuar të vrasë E. K. Gjatë operacionit, në momentin e kapjes në flagrancë nga shërbimet e Policisë, ky person ishte në banesë me oficerin e Policisë të Drejtorisë Vendore të Policisë Dibër, D. H., 30 vjeç, banues në Tiranë, i cili u arrestua në flagrancë nga strukturat e Shërbimit për Çështjet e Brendshme dhe Ankesat (SHÇBA), për veprën penale “Përkrahja e autorit të krimit”. Gjithashtu, gjatë operacionit, bazuar në informacionet se personi në kërkim A. B. posedonte edhe një banesë tjetër, është ushtruar kontroll në ambientet e saj, ku është konstatuar një sasi lëndë narkotike cannabis sativa, me peshë rreth 2.3 kilogramë. I arrestuari i tretë është I. P., 56 vjeç, banues në Tiranë, i cili u arrestua në flagrancë për veprën penale “Prodhimi dhe shitja e narkotikëve”.