Spitali i Prrenjasit, i cili për vite me radhë ka vuajtur nga kushte të vështira dhe mungesa e paisjeve si radiografia, u denoncua në vitin 2018 nga programi investigativ Fiks Fare. Atë kohe, spitali kishte aparatura të vjetra mbi 60 vjeçare, të cilat nuk ofronin shërbime efikase për 40 mijë banorët e zonës, si dhe per rastet e aksidenteve që ndodhnin. Pas denoncimit të Fisk Fare, në vitin 2020, Ministria e Shëndetësisë investoi 25 milione lekë për rikonstruksionin e spitalit, duke u përqëndruar kryesisht në rinovimin e fasadës dhe disa rregullime të brendshme. Megjithatë, pajisjet e nevojshme për të siguruar një shërbim mjekësor të shpejtë dhe efikas, si radiografia, ende mungon. Spitali ka marrë një aparat radiografie “borxh” nga Spitali i Elbasanit, por ai nuk është instaluar ende, pasi mungon vaskë për larjen e filmave, një pjesë kyçe për funksionimin e pajisjes. Kostoja e vaskës varion nga 2,000 deri në 5,000 euro, por Ministria e Shëndetësisë nuk ka arritur ende ta sigurojë atë. Ky problem ka detyruar banorët e Përrenjasit dhe fshatrave përreth të udhëtojnë 40 minuta deri në Librazhd për të kryer një grafikë.