Fiks Fare denoncon një tjetër rast flagrant të tjetërsimit të pronës publike. Shtëpia e Pushimit të Ushtarakëve në Pogradec, e ndodhur në një nga zonat më të bukura pranë liqenit, është dhënë me qira për vetëm 260 euro në muaj, ndërkohë që qiramarrësi ka tejkaluar hapur kontratën duke kryer punime në të gjithë godinën dhe oborrin. Sipas pronarëve të truallit, Ministria e Mbrojtjes dhe Shtabi i Përgjithshëm kanë tentuar privatizimin e objektit, por procesi u anulua pasi u mësua se toka ka pronarë me të drejtë parablerjeje. Pas dështimit të privatizimit, prona u dha me qira pa njoftuar familjet përfituese, ndërsa qiramarrësi vepron si pronar, madje bën kërkesa në emër të institucionit ushtarak. Punime pa plan, pa dokumentacion të plotë, tejkalim i sipërfaqes së marrë me qira dhe heshtje nga institucionet përgjegjëse, ky është realiteti i denoncuar nga Fiks Fare.