Në qiellin e Europës veriore…një zhurmë motori prish qetësinë. Avionë rusë shkelin hapësirën ajrore të Estonisë, Polonisë, Danimarkës dhe një provokim që vijon. Jo rastësi. Jo gabim teknik, por një provokim i qëllimshëm. Nuk është një incident i izoluar, por një shenjë e qartë e tensioneve në rritje midis Moskës dhe NATO-s. Për Estoninë, Poloninë dhe Danimarkën, vende në kufirin lindor të NATO-s, shkelja e sovranitetit ajror është një alarm i fortë sigurie. Aleanca reagoi shpejt, avionët aleatë ngritën alarmin, duke detyruar rusët të tërhiqen. NATO i ka dërguar një mesazh Rusisë që të ndalojë sjelljen e saj “të papërgjegjshme” dhe “të pamatur” kundër shteteve anëtare. Duke paralajmëruar për aktivizimin e Nenit 5, klauzolës së mbrojtjes kolektive që thotë se një sulm ndaj një shteti anëtar të NATO-s konsiderohet një sulm ndaj të gjithëve, Këshilli i Atlantikut të Veriut, i cili u mblodh me kërkesë të Estonisë, shprehu “solidaritetin e plotë” me Aleatët, hapësira ajrore e të cilëve është shkelur. NATO thotë se përgjigja e saj “ndaj veprimeve të pamatura të Rusisë do të mbetet e fortë”. A po forcon vërtet NATO parandalimin ndaj Rusisë, apo thjesht po fiton kohë? Sa gjatë mund të vazhdojë kjo përballje pa rënë në gabimin fatal të një incidenti të pakontrolluar?