Fatmir Sulovari dhe Leonard Theodhori vijojnë të rezultojnë të zhdukur. Policia vendore dhe Forcat e Ndërhyrjes së Shpejtë e kanë përqëndruar në Konispol operacionin e kërkimit për dy personat nga Saranda. Ndërkohë që më herët ata janë kërkuar në zona të ndryshme si Liqeni i Bufit, Xarrë dhe Vrinë. Operacionet e kërkimit vijonin teksa drejtori i Përgjithshëm i Policisë së Shtetit, Muhamet Rrumbullaku shkoi para disa ditësh në Sarandë, për të analizuar provat lidhur me hetimet për zhdukjen e dy 46-vjeçarëve. Para se të shkonte aty, Rrumbullaku priti në zyrën e tij familjarë të tyre , të cilët protestuan para Drejtorisë së Policisë së Shtetit për zbardhjen e ngjarjes dhe gjetjen e Fatmir Sulovarit dhe Leonard Theodhorit. Familjarët e lidhin ngjarjen me shitjen e një toke, ndërsa policia beson se ngjarja lidhet me konfliktet për trafikun e drogës jo vetëm nisur nga precedentët e të zhdukurve por dhe operacionet antikanabis në Greqi, ku ka pasur të arrestuar edhe shqiptarë. Policia po heton të dyja pistat. Në protestën në Tiranë, vëllai i madh i Fatmirit deklaroi që të paktën të gjenden trupat dhe t’i çojmë në shtëpi. (Ardi Pulaj)