Fiks Fare denoncoi se qindra punonjës policie, që ruajnë kufirin, nuk kanë marrë paratë prej 6 muajsh. Prej disa vitesh, një agjenci policore europiane e quajtur FRONTEX patrullon në kufijtë e Shqipërisë, për të parandaluar flukset e emigrantëve të paligjshëm. Ata bashkëpunojnë me punonjës të policisë shqiptare. Sipas marrëveshjes, 80 % e dietave të policëve shqiptarë mbulohen nga BE-ja, ndërkohë që FRONTEX bën edhe parapagim. Por, që nga janari e deri në korrik, këta policë nuk kanë marrë dietat. Ministria e Financave ka bërë një inspektim në Policinë e Shtetit dhe ka gjetur shkelje. Policia e ka kundërshtuar këtë audit, teksa rreth 450 punonjës policie duhet të kthejnë edhe paratë e marra. Janë rreth 198 mijë euro që duhet të kthejnë, teksa 1.2 milionë euro të akorduara nga FRONTEX nuk janë shpërndarë.