Që pas pandemisë, turizmi në Shqipëri duket se po njeh një rritje të ndjeshme. Viti i kaluar ishte edhe viti i rekordeve ku vendi jonë priti më shumë se 10 milionë turistë të huaj të cilët preferuan të kalonin pushimet në Shqipëri e të vizitonin atraksionet turistike që ofron vendi jonë. Edhe viti 2024 duket se ka një trend pozitiv sa i përket turizmit dhe mundësia që rekordi i vitit të kaluar të thyhet sivjet është e lartë. Jehona që mediat e huaja prestigjioze po i bëjnë atraksioneve turistike në Shqipëri është gjithashtu një avantazh për të rritur numrin e turistëve. Mjafton të kujtojmë që vetëm në muajt e parë të 2024 media me peshë në lidhje me turizmin nga Italia, Spanja, Anglia, SHBA, Franca e Gjermania e kanë vendosur Shqipërinë përkrah vendeve kryesore që duhet të vizitohen në Evropë. Kujtojmë që plazhi “Pasqyrat” në Sarandë u shpall si plazhi më i kaltër në botë duke lënë pas perlat e Greqisë, Italisë, Spanjës e Francës. Gazetar: Orest Floku