Kryebashkiaku i Tiranës Erion Veliaj, pas rreth 1 muaj beteje publike për prokurorin e çështjes Ols Dado dhe gjyqtarin e shkallës së parë të GJKKO Erion Bani, do të lërë këtë të martë qelinë e paraburgimit në Durrës për të qenë i pranishëm në Apelin e Posaçëm ku do të kërkojë lirinë dhe rrëzimin e akuzave të ngritura ndaj tij. Sot në SPAK ishte edhe bashkëshortja e Veliajt, Ajola Xoxa, e cila kërkoi heqjen e sekuestros ndaj llogarive të saj. Këtë të hënë Gjykata e Apelit rrëzoi kërkesën e nënës së Xoxës, ku Gjykata la në fuqi sekuestron preventive ndaj vilës në Qerret, për të cilën Valbona Xoxa, kërkoi që të hiqet nga hetimet e SPAK. Grupit të juristëve që po mbrojnë kryebashkiakun e Tiranës, Erion Veliaj i është bashkuar edhe juristi amerikan, Joshua Roberts. 24 orë përpara gjyqit juristët kanë vizituar në IEVP Durrës kryebashkiakun Veliaj. Seanca në Apelin e Posaçëm do të drejtohet nga gjyqtari Engert Pëllumbi. Çfarë do të ndodh me procesin gjyqësor që tronditi mazhorancën? A do t'i bashkohet Erion Veliaj trupës së Partisë Socialiste në fushatë ashtu siç ka premtuar?