7 familje nga Durrësi pa mjete identifikimi e kontrolle kanë kaluar kufirin Morinë- Vermicë natën e 28 nëntorit. Por, pas akomodimit në një nga motelet në periferi të Prishtinës, ata janë marrë në pyetje nga autoritetet e vendit me qëllim të identifikimit të të gjithë qytetarëve që erdhën në Kosovë për të shpëtuar nga ndonjë rrezik tjetër i mundshëm nga tërmetet. Atyre u është ofruar ndihmë jo vetëm nga organizatat joqeveritare por edhe nga mjekët e psikologët. Përveç këtyre, drejtoria komunale e arsimit në Prishtinë ka marrë informacionet për të gjithë fëmijët që me familjet e tyre janë vendosur në Prishtinë që të vijojnë mësimin në shkollat më të afërta deri në kthimin e tyre në Shqipëri. Megjithëkëtë institucionet ende nuk e dinë sa është numri i qytetarëve që kanë ardhur për akomodim. Por, kryeministri në detyrë, Ramush Haradinaj ka thënë se po bëhet e pamundura për menaxhimin e situatës. Në anën tjetër, Ambasada e Shqipërisë në Kosovë ka kërkuar nga të gjitha bizneset, shoqatat, organizatat dhe individët që të raportojnë për personat që janë duke i akomoduar. Policia e Kosovës ka njoftuar se që pas tërmetit, mijëra qytetarë kanë kaluar kufirin, por pa dhënë detaje nëse të gjithë qytetarët janë nga zonat e prekura nga tërmeti.