Rreth një muaj pas denoncimit të emisionit Fiks Fare për mbetjet spitalore të hedhura në mënyrë të paligjshme në fshatin Mihaj të Koplikut, situata mbetet alarmante. Mbetjet ndodhen ende në të njëjtin vend, të paasgjësuara, ndërkohë që eskavatori që dyshohet se i mbuloi, është zhdukur nga vendngjarja pa u identifikuar ende pronari dhe pa përfunduar hetimet. Në kohën e publikimit të rastit, policia kishte vendosur shirita sigurie rreth zonës dhe mbante nën vëzhgim territorin, ndërsa një eskavator ndodhej në vendngjarje. Bashkia e Malësisë së Madhe u distancua nga mjeti, duke deklaruar se nuk ishte në pronësi të saj dhe deri më sot nuk ka pasur një konfirmim zyrtar se kujt i përkiste mjeti ndërtimor që mbuloi mbetjet e rrezikshme. Pra eskavatori u zhduk ndërkohë që hetimet ende nuk kanë përfunduar.