Albin Kurti nuk arriti ta shijonte postin e kreut të ekzekutivit të Kosovës për më shumë se dy muaj. Me koalicionin e tij të brishtë VV-LDK, dukej sikur eci gjithë kohën mbi një fushë të minuar. Dallimet që e zgjaten për muaj të tërë arritjen e marrëveshjes së bashkëqeverisjes nuk u vanitën kurrë plotësisht, dhe në fund shpërthyen me hendekun e qëndrimeve mbi reciprocitetin dhe qasjen ndaj dialogut me Serbinë. Shumë shpejt do të bëhej e qartë se reaksioni zinxhir që nisi me shkarkimin e ministrit të brendshëm Agim Veliu për mosbindje në cështjen e pandemisë e përfundoi me rrëzimin e qeverisë të nxitur nga mocioni I mosbesimit I paraqitur në Kuvend nga LDK, ishte një “tymnajë” për të eklipsuar problemet e vërteta. Kurti, sic thonë disa, qe kthyer në pengesë për planin e madh, atë të një marrëveshjeje finale mes Prishtinës dhe Beogradit, e cila lipset të firmoset sa më shpejt që të jetë e mundur. Pikërisht arritja e kësaj marrëdhëveshjeje vuri në kurs përplasjeje SHBA-në me BE-në nismëtare të dialogut, por që në gati një dekadë zvarritjeje të procesit nuk arriti të prodhojë rezultatet e shpresuara.