60 vjet pasi lideri ikonik i saj Charles de Gaulle u përball me një tentativë për grusht shteti nga gjeneralë rebelë, të tërbuar nga vendimi I tij për tërheqje nga Algjeria, daullet e konfliktit civil gjëmuan sërish në Francë. Prej ditësh, media dhe politika vendase është pushtuar nga lajmet mbi letrën e hapur të një ish-kapiten xhandarmërie, firmosur nga më shumë se 2000 ish- ushtarakë e personel aktiv, burra e gra, ku rreshtohen “rreziqet vrastare” me të cilat përballet vendi dhe paralajmërohet se nënshkruesit “ nuk mund të qëndrojnë indiferentë për fatin e atdheut të tyre të bukur”. Me tone dramatike, letra përshkruan rreziqet nga “islamizmi dhe hordhitë e periferive”. “Ata që drejtojnë këtë vend duhet në mënyrë urdhërore të gjejnë kurajon për të çrrënjosur këto rreziqe”, ishte mesazhi i prerë, i lëshuar jo më kot në përvjetorin e grushtit të dështuar të shtetit të vitit 1961. Një paralajmërim i fortë për Macron, por a do të përmbyset presidenti francez? Cili është rreziku real që i kanoset atij?