Fillimisht u kalua thjesht si kuriozitet, por më pas, kur raportimet nisën të shtohen ndjeshëm, shfaqja e dronëve misteriozë në qiellin e Shteteve të Bashkuara e gjeti rrugën drejt pasqyrimit në shtypin vendas, drejt mendimit të shqetësuar të anëtarëve të Kongresit e në fund, edhe vëmendjes së vetë presidentit të zgjedhur Donald Trump. Janë mbi 5.000 raportime për dronë të shfaqur papritmas në pjesë të ndryshme të SHBA-së, për të cilat publiku kërkon përgjigje, edhe pse sipas autoriteteve vetëm 100 prej tyre kërkojnë hetim të mëtejshëm. Senatori demokrat Richard Blumenthal bëri thirrje që dronët misteriozë që janë parë duke fluturuar natën, mbi zona të ndjeshme në Nju Xhersi dhe pjesë të tjera ndërmjet shteteve verilindore dhe juglindore të vendit, "të goditen e të rrëzohen, nëse do të jetë e nevojshme"!