“Nuk do të ketë më kthim prapa”: Në këto ditë pranvere, të rralla janë vendet vërtet ku mbretëron një paqe thuajse hyjnore si në Lappeenranta, një qytezë e vogël kufitare e Finlandës, e vendosur pranë njërit prej liqeneve më të mëdha të Europës në mesin e një pejsazhi idilik. Por për 70 mijë banorët e saj, gjërat kanë ndryshuar, këto kohë. “Jam ndjerë gjithmonë shumë e sigurtë në këtë qytet, këtu jam lindur e rritur, por që prej luftës, nuk është më njësoj. E ndiej që më ka përfshirë ankthi”, thotë Noora Ikonen, një banore e zonës. Lufta së cilës ajo i referohej po ndodh në Ukrainë, 1.000 milje larg. Por një fakt i tillë nuk përbën ngushëllim. Finlanda ndan një kufi prej 830 miljesh me Rusinë dhe Lappeenranta është vetëm 19 milje larg vijës kufitare. Ajo në fakt, më afër është me vendlindjen e Vladimir Putinit, qytetin e Shën Petërburgut, sesa me kryeqendrën e Finlandës, Helsinkin.