Temperatura që shkrijnë asfaltin në rrugë, zjarre rebele të pamundura të frenohen, thatësira që po shtrihen ngadalë në heshtje, duke gllabëruar toka cdo vit e më shumë: Europa këtë verë, po kthehet në pasqyrën e apokalipsit të shumëtrumpetuar të klimës, i profetizuar prej kohësh, por që pak ia kanë vënë veshin. Qindra vdekje të raportuara në gadishullin IBerik kur stina e nxehtë është ende në mesin e saj, ndërsa përvëlimi ka pushtuar rajonet nga Portugalia në Ballkan. Shkencëtarët e klimës nuk i kemi parë ndonjëherë më të shqetësuar. Përllogaritjet e tyre flasin qartë: valët e të nxehtit po bëhen më intensive, më të shpeshta e më të gjata. Është e pamundur që në kushte të tilla, të mos bëhet lidhja me ndryshimet e klimës, të kthyera në shpatën e Demokleut që kërcënon planetin. Temperaturat 40 gradë që shihni tani, nuk janë asgjë, paralajmërojnë ekspertët, sepse nëse nuk veprohet për uljen e emetimeve, valë të tilla të të nxehtit, përmbytjet dramatike dhe fenomene të tjera ekstreme të motit, përgjatë tre dekadave të ardhshme, do të bëhen të zakonta..