Konflikti në Ukrainë tronditi qetësinë disa dekadëshe të Europës, e bashkë me të dhe bindjen e rrënjosur mes brezash të tëra se kontinenti i vjetër nuk do të përballej më me fantazma luftrash të përgjakshme transformuese. Pasojat po ndihen jo vetëm nga ukrainasit e thjeshtë… Gjurma e luftës së Ukrainës ka nisur të ndihet e fortë shumë larg kufijve të saj; uji i Mesdheut është ndër të parët që po shkumon. I ngërthyer në një mosmarrëveshje të vjetër territorial, rajonit i kthehen ethet e një konflikti që i ngjason një vullkani të fjetur: asnjehere nuk e llogarit dot se kur do të shpërthejë sërish. Dy aleatë të NATO-s, Greqia dhe Turqia duket se po mprehin shpatat sërish. Aleanca u krijua për të mbrojtur vendet e saj anëtare nga armiqtë e jashtëm; por si i bëhet kur në armik mund të kthehet pikërisht fqinji dhe aleati yt?