Si demokratët, ashtu edhe republikanët kanë bërë gjithë c`kanë mundur këto javët e fundit për të treguar se presidenti Donald Trump duhet shkarkuar sipas të parëve, e duhet të qëndrojë aty ku është sipas të dytëve. Ashtu sic edhe mund të pritej, qëndrimet e të dy kampeve për këtë cështje janë thellësisht të ndara. Kreu demokrat i komisionit, Jerrold Nadler nuk ka lënë rast pa e përsëritur se "Presidenti amerikan e vuri veten mbi vendin", kur nxiti Ukrainën të hetonte njërin prej sfidantëve të tij kryesorë demokratë për zgjedhjet e 2020-tës, ish zëvendëspresidentin Joe Biden, ndërsa për të ushtruar presion, sic mund të lexohet mes rreshtave të deklaratës së tij, pezulloi përkohësisht 391 milion dollarë ndihmë ushtarake që i nevojitej vendit aleat Ukrainës për të luftuar kundër separatistëve pro-rusë në rajonet e tij lindore. Për Nadler, Trump shkeli besimin e popullit, duke rrezikuar kushtetuten, demokracinë amerikane dhe vetë vendin. Në kampin tjetër, nuk e shohin kështu. Lëvizja e demokratëve do të thotë se Trump mund të kthehet në presidentin e tretë në historinë amerikane ndaj të cilit nisin procedurat e shkarkimit. Por cfarë mendojnë amerikanët e thjeshtë?