Një 56-vjeçar në Lezhë, është arrestuar nga policia pasi tregtonte qindra fishekzjarre dhe kapsolla me fuqi të lartë shpërthyese. Në dyqanin e tij me artikuj ushqimorë në lagjen “Nënë Tereza”, janë gjetur dhe sekuestruar një sasi lëndësh piroteknike që konsiderohen të rrezikshme për jetën e qytetarëve nëse përdoren nga fëmijët apo persona të paautorizuar. 56-vjeçari, identiteti i të cilit nuk është zbuluar nga forcat blu, akuzohet për veprat penale “Shkelja e rregullave mbi lëndët plasëse, djegëse dhe radioaktive”, “Prodhimi dhe shitja e ushqimeve dhe lëndëve të tjera të rrezikshme për shëndetin”, “Shkelja e të drejtës së pronësisë industriale” dhe “Tregtimi dhe transportimi i mallrave që janë kontrabandë”. Ndërsa policia bën apelin që kushdo të denoncojë rastet e tregtimit apo përdorimit të fishekzjarreve dhe i kërkon qytetarëve që të qëndrojnë me familjet e tyre në natën e ndërrimit të viteve për të respektuar rregullat anti Covid. Njoftimi i plotë: Policia e Shtetit Vijojnë kontrollet në të gjithë vendin, për parandalimin e hedhjes në treg të lëndëve piroteknike dhe fishekzjarrëve që rrezikojnë sigurinë publike, jetën dhe shëndetin e qytetarëve. Evidentohet nga shërbimet e Drejtorisë Vendore të Policisë Lezhë, një pikë shitjeje e lëndëve piroteknike me fuqi të lartë shpërthyese. Sekuestrohen qindra fishekzjarrë dhe kapsolla me fuqi të lartë shpërthyese të rrezikshme për jetën e qytetarëve gjatë përdorimit civil të tyre.