Fiks Fare denoncoi mbrëmjen e së martës problematikat e qytetarëve që u prekën nga ndërtimi me koncesion i rrugës me pagesë Thumanë – Kashar. Megjithëse aksi është vënë në qarkullim dhe firma po vjel paratë nga përdoruesit e rrugës, dhjetëra banorë të fshatit Bërxullë në Tiranë enden në dyert e institucioneve. Kujtim Zeneli kishte një banesë në proces legalizimi. Firma ia prishi, pasi dilte në gjurmën e rrugës. Nuk i dha asnjë qindarkë. I mori mbi 1000 metër katrorë pronë, që e kishte të certifikuar dhe shteti i dha 500 mijë lekë. Ndërtimi i rrugës i prishi edhe rrugën për në tokë, ku aktualisht ai ropatet në rrjeta metalike dhe në kanale për të shkuar te prona 7500 m2. Por jo vetëm kaq; familjet që iu prishën shtëpitë dhe s’morën dëmshpërblim shteti duhet t’u jepte 3 vite bonus qiraje. Kujtimi nuk ka marrë asnjë kacidhe!