Me hetimet që kishin nisur në afërsi të gjimnazit “Petro Nini Luarasi” në Tiranë, policia aty bëri para dy ditësh dhe një blerje të stimuluar droge, që më pas rezultoi me arrestimin e 20 personave dhe shpalljen në kërkim të katër të tjerëve, pjesë e një rrjeti të shpërndarjes së drogave në këtë shkollë, por edhe në të tjera të kryeqytetit. Shkollat ishin një pjesë e rëndësishme e aktivitetit të rrjetit, por personat e shpërndanin dhe shisnin atë edhe në lokalet e natës. Skema zbatohej sipas një profili të ulët: Shpërndarësit qëndronin në afërsi të shkollave ku kontaktonin të rinjtë dhe shisnin droga të llojeve të ndryshme. Ata lëviznin me transport publik dhe kur dita e shkollës kishte përfunduar, ata gjatë orëve të mbrëmjes zhvendoseshin në bare e klube në zona të ndryshme të Tiranës, ku po ashtu kishin siguruar blerës. Komunikimi në telefonët celularë mes shitësve dhe blerësve bëhej duke përdorur kode për llojin e drogës, për shembull kokaina quhej “pluhur zanash”. Kode përdoreshin edhe për sasinë e kërkuar. Nga hetimet është zbuluar se kokaina që shpërndahej në Tiranë sigurohej nga një shtetas i huaj nga Lindja e Mesme, ndërsa hashashi vinte nga Fushë Kruja. Shpërndarësit e drogave, pas arrestimit, kanë pranuar të përgjigjen me heshtje kur janë pyetur se kush i furnizonte me lëndë narkotike. (Ardi Pulaj)