Fiks Fare denoncon një tjetër rast alarmant të ndërtimit të HEC-eve pa përgjegjësi, që po shkatërrojnë zonat rurale në Shqipëri. Në fshatin Kërpicë, Njësia Administrative Kushovë, Gramsh, ndërtimi i një hidrocentrali ka devijuar rrjedhën e lumit Tomorricë, duke përmbytur toka bujqësore dhe duke rrezikuar banesat e banorëve. Sipas banorëve, kompania ndërtuese kishte premtuar ndërtimin e pritave lumore, por për gjashtë vite me radhë nuk ka kryer asnjë ndërhyrje, ndërsa ka mbrojtur vetëm veprën e vet me beton, duke shkaktuar dëme të mëdha në anën e fshatit. Territori është i shkatërruar, rrugët janë bërë të pakalueshme dhe fshati po braktiset. Banorët thonë se janë lënë në harresë nga institucionet shtetërore dhe jetojnë çdo ditë me frikën e përmbytjes.