Dhjetëra ish-ushtarakë në qarkun e Fierit u ankuan në redaksinë e “Fiks Fare” se po iu mbahet pensioni për vite me radhë. Ata pohojnë se kanë dalë dhjetëra akte ligjore dhe nënligjore për të përfituar statusin e ushtarakut. “Unë kam dalë në rezerve në vitet ’90. Pasi dola mora pension të parakohshëm si ish-ushtarak në bazë të statusit. U pagova për vite me radhë dhe, para disa vitesh, dosja ime u rishikua dhe rezultoi se m’a kishin dhënë pensionin e parakohshëm në mënyrë të padrejtë. Tani, nga viti 2013 deri në këto ditë, mua më mbahet një shumë prej 4 mijë lekësh nga pensioni çdo muaj. Me këto ritme, unë e shlyej borxhin në vitin 2031. Shpresoj të jem gjallë” pohon Llaqi Pine, ish-ushtarak. Pas ankesës, gazetarët e Fiks Fare bashkë me denoncuesin Llaqi Pine shkuan në Drejtorinë Rajonale të Institutit të Sigurimeve Shoqërore në Fier. Instituti pranon se gabimet e përllogaritjes janë bërë kohë më para. Më tej sqarojnë se, kanë dalë disa VKM për këtë kategori. Fillimisht, qeveria kishte përcaktuar se, ish – ushtarakët që kishin marrë tokë bujqësore në bazë të ligjit 7501, nuk përfitonin pension të parakohshëm si ushtarak. Por, ky përjashtim u hoq në vitin 2019. Vendimi përcakton se, ish-ushtarakët nuk e kanë kusht nëse kanë përfituar ose jo tokë bujqësore. Në bazë të këtij vendimi, ata përfitojnë pension të parakohshëm në bazë të statusit të ushtarakut, edhe pse kanë marrë tokë! Sigurimet Shoqërore pohojnë se ky vendim prek vetëm ish ushtarakët që kanë marrë pension të parakohshëm. Jo ata ish ushtarakë që, në momentin e daljes së këtij vendimi, kanë qenë në pension pleqërie. Vendimi s’ka fuqi prapavepruese, duke lënë jashtë 36 ish-ushtarakët që u ankuan në Fiks Fare.