Pas një ngërçi tre vjeçar, dy partitë kryesore politike janë duke zhvilluar negociata për të zgjedhur Avokatin e Popullit. Kreu i grupit parlamentar të Partisë Demokratike i ka dërguar kreut të Kuvendit Niko Peleshi formulën e përzgjedhjes. Sakaq, deputetët opozitarë kishin hedhur firmat e tyre për kandidatët, por më pas, siç bëri të ditur në një njoftim për mediat, Partia Demokratike tërhoqi firmat për të gjithë kandidatët. Ishin gjashtë kandidatë të cilët kishin marrë firmat e deputetëve demokratë, e sipas propozimit të depozituar tek kryeparlamentari Peleshi, maxhoranca do të zgjidhte tre dhe pakica voton njërin prej tyre. Kuvendi ka vendosur që një deputet mund të firmosë vetëm për një kandidat dhe duke pasur parasysh që duhen të paktën 28 firma, vetëm një ose dy prej tyre mund të shkojnë në kuvend për tu votuar.